गोकुळ दूध संघाची (Gokul Milk Federation general meeting) वार्षिक सर्वसाधारण सभा पार पडली. या सभेत विरोधकांनी आक्रमक पवित्रा घेतला होता. शौमिका महाडिक (Shaumika Mahadik Kolhapur) आणि महाडिक गटाचे सभासद येण्यापूर्वीच सभागृह संपूर्ण भरलेले होते. त्यामुळे त्यांना पुढे बसण्यासाठी जागा मिळाली नाही आणि यानंतर गोकुळच्या सभेत जोरदार घोषणाबाजीला सुरुवात झाली होती. दोन्ही गटाच्या कार्यकर्त्यांकडून जोरदार घोषणाबाजी करण्यात आली.

त्यानंतर आता शौमिका महाडिक यांनी आपली भूमिका मांडत सत्ताधारी गटावर टीका केली आहे. या संदर्भात शौमिका महाडिक यांनी फेसबुक पोस्ट केली आहे.

गोकुळच्या वार्षिक सभेत शेवटी जे सत्ताधाऱ्यांकडून आम्हाला अपेक्षित होतं तेच झालं! सत्ताधाऱ्यांनी पळपुटेपणा दाखवला, दूध उत्पादकांच्या नजरेला नजर भिडवून आम्ही विचारलेल्या एकाही प्रश्नाचं उत्तर द्यायचं धाडस त्यांनी केलं नाही. ‘कर नाही त्याला डर कशाला’ अशी आपल्याकडे एक म्हण आहे. परंतु सत्तेत आल्यापासून यांच्या काळ्या कर्तृत्वाची यादी थांबेचना! अक्षरशः संघ ताब्यात घेण्यापासून ते सत्तेचा गैरवापर करत जे काही लाभ उठवता येतील त्यासाठीचे यांचे प्रयत्न जोमाने सुरू आहेत.